跳至主要內容
Yieldooo.

利率升跌時,應選短期定存還是鎖定較長年期?

Yieldooo 編輯部
Yieldooo 定存年期封面圖:利率曲線升到頂再回落,短期定存逐級追上加息、長年期定存鎖定高息
本文目錄

如果你手上有筆閒錢想擺定存,最常問起嘅一條問題係:我應該做 3 個月,定係 1 年呢?

要選擇做幾長定期,我哋可以思考兩樣嘢:

  1. 呢筆錢幾時要用。
  2. 你預計利率會向邊個方向行:會繼續升,定已經到頂、開始跌。

預計短期內要用錢的話,當然不可以做長年期的定期存款。

而利率走向,短期其實連專家都未必估到,不過長周期卻有跡可尋。一般預期銀行開始加息後,會展開加息周期,利率會向上調整幾次。

相反地,減息一次後,市場又會預期展開減息周期,利率會向下調整幾次。我哋要靈活變動,應對情況。

定存利率經常變,點樣選擇最著數?

前文提到,利率走向有三種:加息,減息,不加不減。

如果好確認係加息或減息,全數選擇「短期」或「長期」即可。但如果無法估計的話,採用「定存階梯」係一種折衷方法。

「定存階梯」即係筆錢分成幾份,一部份做短定期,另一份做長定期。唔使一次押晒一邊。好處係如果加息,平均計仍然可以提升定存回報。但當然會被「長定期」的部份拉低了一點。

做短期(例如 3 個月)鎖長年期(例如 12 個月)定存階梯
預期加息續期時下一筆享受更高利率已鎖住,中途加息冇份短期部份仍可跟隨加息,拉高總體回報
預期減息續期時息口會跟住跌,回報立即減低已鎖定利率,一年後再算長期部份已鎖定較高利率,托起總體回報
不加不減保持回報。但到期後遇上減息,下一筆回報立即減低開立定存後才加息,無法「上車」提升回報每格到期先判斷,唔使一次押晒

預期利率上升時:做 3 個月短期

如果你認為利率會繼續升,短期存期一般嚟講有利。每次到期後,即可按新利率再存過,息口即時更新;緊貼最新利率。

不要自動續期

千萬唔好使用「自動續期」。一筆定期可以設立「到期指示」,如果你選了「本息續存」或「提取利息,本金續存」,銀行會用到期嗰日嘅牌價自動續期,一般來講,牌價利率只有零點幾厘。

網上討論區有個帖文講,原本預計續期後可以有 3 厘,點知變咗得返 0.15 厘……

「新資金優惠」

現時香港銀行生態,高息的定期存款都係以「新資金優惠」方式提供。每間銀行的新資金定義都唔同,呢方面讀者需要留意。

預期利率見頂回落時:做 12 個月長期

如果你認為利率已經到頂、開始跌,鎖長年期一般嚟講有利。

在高位鎖定息率,中途利率跌落嚟都唔受影響。但記住只有唔使動嘅錢(閒錢)先好做長年期的定存。

點解要鎖?上一次減息周期,一年間嘅息率可以相差很遠:

  • 2023-12-05,找到媒體報道 Fusion Bank 有 12 個月 4.7 厘嘅報價。
  • 2025-05-30,媒體報道最好嘅 12 個月息,係 PAObank 嘅 2.5 厘。

一年半,定存利息下跌了接近一半。

預期利率見頂回落嗰陣,趁高位鎖定長年期,先至唔使之後逐季跟住啲息一齊跌。

估唔到利率方向時:用「定存階梯」

如果市場消息紛亂,估唔到利率會升定跌,可以採用「定存階梯」策略,將筆錢分開幾份。每次到期時再判斷,唔使一次押晒一邊。

假設例子:你有 HK$300,000 閒錢,可以分成三份:

金額存期到期點處理
第一份HK$100,0003 個月到期再判斷:覺得利率仲會升,續做 3 個月;覺得見頂回落,轉做 12 個月
第二份HK$100,0006 個月同一做法
第三份HK$100,00012 個月坐足一年,鎖住開存時嘅息

咁樣每 3 個月左右有一筆到期:有錢周轉之餘,又唔使一次 lock 實哂。加息的話,剛到期的資金可以跟進做 3 個月定期;如果進入減息階段,則可以改做 1 年長定期,保持靈活。

不過階梯唔會令你賺多啲利息,主要分散押錯方向嘅影響。

  • 如果加息:短期部份仍可跟隨加息,拉高總體回報。
  • 如果減息:長期部份已鎖定較高利率,托起總體回報。

參考過去的息率週期

我哋不妨以真實數據計一計上文提及的方法,產生出來的效果。

美國利率走勢圖,2014 年 7 月至 2026 年 11 月:2022 年起急升,2023 年中升到最高位,其後逐步回落

美國利率走勢(2014 年 7 月至 2026 年 11 月)。資料來自:Fair Economy

當時銀行的定存利率

Yieldooo 從網上找回過去富邦銀行(香港)的定期存款優惠,與美息對照一下。

定存息率以「港元 50 萬以上」,「美元 30,000 / 65,000* 或以上」的最高等級來參考。 *2023 年至 2024 年中最高等級為美元 30,000 或以上,2024 年 9 月起最高等級為美元 65,000 或以上

* 2022 年的新資金優惠屬『分行開立優惠』,門檻為等值港元 50 萬或 100 萬以上(每次不同),當時未有『手機 App 開立優惠』;其餘各期的利率,屬『手機 App 開立優惠』;當中 2023 年至 2024 年中屬新資金優惠,2024 年 9 月起改為不論新舊資金。

頁面標示日期美息(上限,厘)3 個月港元(厘)12 個月港元(厘)3 個月美元(厘)12 個月美元(厘)
2022-07-29*2.502.43.13.13.6
2022-09-23*3.253.13.73.74.3
2022-12-01*4.50†4.65.14.65.1
2023-02-285.003.63.64.84.8
2023-05-245.253.93.94.94.9
2023-09-295.504.84.85.15.1
2023-11-275.504.94.65.35.1
2024-03-055.504.44.05.24.7
2024-05-305.504.154.155.35.0
2024-09-115.00‡3.53.54.64.4
2024-12-194.503.83.24.44.1
2025-01-244.503.73.24.154.1
2025-03-174.503.43.14.13.95
2025-05-234.501.62.14.33.9
2025-08-214.502.02.04.23.8
2025-12-123.752.92.63.93.5

† 2022-12-01 嗰行嘅美息 4.50 厘,係就近配對 2022-12-14 公布嗰個數字;12 月 1 日當日生效緊嘅上限其實係 4.00 厘,加息係 12 月 14 號先公布。 ‡ 2024-09-11 嗰行嘅美息 5.00 厘,係就近配對 2024-09-18 公布嗰個數字;9 月 11 號當日生效緊嘅上限係 5.50 厘,減息係 9 月 18 號先公布。

兩者嘅關係

可以見到銀行定存優惠嘅升降,方向大致跟住美息。所以美國觀察息率週期相當重要。

加息週期

2022 至 2023 年 7 月利率上升期:

每次都做 3 個定期的話,下一次再做時,息口會跟住升。如果做了一年期,要在 2024 年才可以在下一筆享受高利息。

用返上表富邦嘅利率計一次:以 2023 年 2 月尾做起點、一年為期,每個方法用 HK$300,000 計(單息;續做嗰陣用最接近嗰期公布嘅利率):

方法點做一年利息
每次做 3 個月三份都做 3 個月、四季續做(3.6 → 3.9 → 4.8 → 4.9 厘)HK$12,900
定存階梯一份續做 3 個月(HK$4,300)、一份做 6 個月再續(3.6 → 4.8 厘,HK$4,200)、一份鎖 12 個月(HK$3,600)HK$12,100
做 1 年三份都鎖 12 個月(3.6 厘)HK$10,800

從表格可見,在加息周期,做多次 3 個月短定期,得到的總利息是最多的。因為可以緊貼加息步伐。

減息週期

2024 至 2025 年利率下跌期:

做 3 個定期,每季續做,息口會跟住跌。相反,在高位做了一年期定期的話,利率鎖定在高位。到了做下一筆時才跟著下降。

用返上表富邦嘅利率再次計算:以 2023 年 11 月尾(利率見頂之後)做起點、一年為期,每個方法用 HK$300,000 計(單息;續做嗰陣用最接近嗰期公布嘅利率):

方法點做一年利息
做 1 年三份都鎖 12 個月(4.6 厘)HK$13,800
定存階梯一份鎖 12 個月(HK$4,600)、一份做 6 個月再續(4.6 → 4.15 厘,HK$4,375)、一份續做 3 個月(約 HK$4,238)約 HK$13,213
每次做 3 個月三份都做 3 個月、四季續做(4.9 → 4.4 → 4.15 → 3.5 厘)約 HK$12,713

這次計算中,在減息周期,做多次 3 個月短定期,得到的總利息是最少的。因為它緊貼了減息步伐。

從以上兩次計算可以見到,選擇做短期或長期嘅定期存款,喺唔同嘅利率走勢下面確實有差別。唔係做最長年期就一定最好。

兩個常見誤解

誤解一:存款年期愈長,年利率必然愈高

銀行每一檔年期嘅利率都會按當時情況改,並非一定係年期愈長就愈高。睇返上面富邦張定存利率表:

  • 2023 年 11 月尾,3 個月係 4.9 厘,12 個月係 4.6 厘,短年期較高。
  • 2022 年 12 月就相反,分行新資金優惠 3 個月 4.6 厘,12 個月係 5.1 厘。

兩個方向都出現過。所以每次都要比較一下利息。

誤解二:年利率高,成筆錢都賺嗰個息

有啲高息,淨係計筆錢嘅一部分。

2025 年 5 月底,香港經濟日報 Wealth 嘅報價一覽入面,中國建設銀行(亞洲)有個 3 個月港元定存標到 5.58 厘,好搶眼。

不過條件要同數字一齊睇:

  • 嗰個息只計新資金嘅頭 10%;
  • 其餘九成計每日浮息(報道引用嗰陣係 1.1 厘);
  • 而且要係新嘅 Private Wealth(私人財富)客戶、新資金 HK$5,000,000 或以上先有份。

即係話,5.58 厘唔係成筆錢嘅息。用足 HK$5,000,000 入場計一次(假設浮息三個月內維持 1.1 厘):頭 10% 即 HK$500,000 計 5.58 厘,三個月利息約 HK$6,975;其餘 HK$4,500,000 計 1.1 厘,約 HK$12,375;合共約 HK$19,350。

成筆錢拉勻嚟計,相當於年息大約 1.55 厘,同標題嗰個 5.58 厘差好遠。

所以見到推廣訊息,點都要自己理解一下條款,並且計一計數。否則好容易中伏了。

#定期存款#定存階梯#利率週期

更多「定期存款」

Yieldooo 外幣跨行轉賬封面圖:兩間銀行之間一支箭嘴,上面係美元、人民幣、歐元、英鎊等貨幣符號

定期存款2026年11月19日

本地外幣跨行轉賬的幾種方法

手上有外幣想搬去另一間銀行做新資金定存優惠,應該用邊種方法?CHATS、支票、電匯邊隻貨幣用得,邊隻唔得,逐隻貨幣講清楚。